domingo, 18 de febrero de 2018

24 DE FEBREIRO. DÍA DE ROSALÍA

Esta semana imos traballar a figura da insigne escritora para conmemorar o 24 de febreiro, aniversario do seu nacemento. Esta celebración foi proposta pola Asociación de escritores e escritoras en Lingua Galega desde o 2010.

Queremos sumarnos á proposta feita pola AELG :

"Para expandir o poder da palabra de Rosalía de Castro entre a xente nova, a AELG convida a celebrar o Día de Rosalía de Castro nos centros de ensino con estas accións colectivas de difusión da súa obra, ideadas a partir do manifesto da AELG:

Educación Infantil e Primaria
Para estas etapas de ensino o lema da proposta #AbrideAFiestra pode desenvolverse a través de actividades que permitan a cada alumna ou alumno facerse cómplice da Rosalía de Castro da que se sinta máis próxima/o. Para isto, despois de facer un repaso da figura literaria da Autora, e dalgunhas lecturas que dean conta da pluralidade significativa da súa obra,  propoñemos para o venres 23 de febreiro que cada alumna/o elabore, nun soporte que poida ser pendurado nunha fiestra ou pegado na parte interior dos vidros das fiestras (tea, cartolina ou similar), algún elemento iconográfico de Rosalía de Castro e/ou transcriba os seus versos soltos ou poemas completos para lles dar luz desde as fiestras e tentar facelos visíbeis socialmente.
Esta iniciativa pretende ademais que o alumnado comparta esta celebración coa súa familia e veciñanza. Para isto faríanse fotos do alumnado, acompañado ou non das súas persoas maiores, portando entre ambos outro pequeno cartel cun verso rosaliano da escolla da alumna ou alumno e mostrándoo nesas fiestras que, coa axuda de Rosalía, abrimos a un mundo e un tempo novo."
Os pequenos e pequenas de Infantil xa empezaron o venres a preparar o material para elaborar a súas rosas para Rosalía; e os maiores, os retratos para adornar as fiestras.









domingo, 21 de enero de 2018

SEMANA DA PAZ NA BIBLIOTECA

Como cada ano, dende a Biblioteca,  espazo de  repouso, calma e lectura por excelencia queremos sumarnos aos actos programados no Centro para celebrar o 30 de xaneiro, Día Escolar da Non Violencia e a Paz e que así foi recoñecido pola UNESCO no 1993. 
Nesta data se lembra  a necesidade de educar na tolerancia,  solidariedade,  respecto aos Dereitos Humanos, na non- violencia e na paz. Con todo, estes valores deben ser os pilares nos que se asenta a educación e resulta necesario poñelos en práctica cada día en todos os ámbitos: na escola, na familia, na rúa, no traballo... porque a PAZ é o MELLOR.


Ao longo desta semana, estiveron expostos unha variedade de títulos relacionados con valores de Paz e convivencia e en concreto a colección "Libros para pensar". Deste modo, mestres e mestras, alumnos e alumnas, puideron prepararse para a data que se aproxima.



A páxina de ACNUR (Alto Comisionado das Nacións Unidas para os Refuxiados) dispón dunha serie de recursos didácticos dirixidos ás diferentes etapas educativas. Imos traballar nas aulas estas temáticas e, como motivación, temos na biblioteca o libro da editorial Kalandraka: "Un cuadro de Picasso"




Así mesmo, aproveitaremos a "Hora de ler" para que os/as maiores lles lean un conto aos máis pequenos e pequenas, cuxos argumentos fomenten algúns destes valores. Estiveron ensaiando toda a semana en horario de lecer,  para que esta lectura lles resulte fluída e amena. Os títulos escollidos son:
  • "A cebra Camila"
  • "A derradeira cincenta"
  • "Tiempo de compartir"
  • "Por que a Mª José lle chaman José Mari?"  
E chegou o luns, a "Hora de ler". A María, Noelia, Lucía, Nuria, Naiala e Zulema non lles chegaba a hora de ir contar o conto que, con tanto agarimo, prepararan para os máis pequenos e pequenas. A continuación podemos ver imaxes do divertido momento:


Noelia e María nun intre da lectura de "A cebra Camila" en 6º de ED Infantil






Moi satisfeitas co libro e coa cebra Camila na man.






Lucía e Nuria, en 1º de Ed Primaria, quixeron poñer un sombreiro de copa para engadir importancia ao momento da lectura de "A derradeira Cincenta"












                   Naiala e Zulema lendo sobre o valor de COMPARTIR en 2º de Ed. Primaria. Ao igual que as protagonistas do conto,  elas tamén son xemelgas e coñecen ben as ventaxes que supón o feito de compartir e traballar en equipo.











O martes, os máis pequenos tamén puideron gozar da lectura dun conto de produción propia que define  a Paz en positivo. Patricia e Lucía, alumnas de 6º de Primaria, foron as encargadas de achegar a actividade aos máis cativos do colexio, alumnos e alumnas de 4º de Ed Infantil. Tanto lles gustou, que acabaron poñendo en práctica o que as maiores lles leron con tanto cariño. 

Patricia e Lucía lendo moi animadas.



Lucía estivo encantada de dar e recibir.
Resultou un éxito para todos e todas.

Pola súa parte, Marina de 6º de Primaria, traballou co alumnado de 3º de Primaria a igualdade de xénero, un dereito do que é necesario ter conciencia desde a primeira infancia. O título lido foi; "Por que a Mª José lle chaman José Mari?" 

Marina, lendo o conto.

O venres decoramos as paredes do vestíbulo da Biblioteca cos traballos feitos por alumnos e alumnas de 2º de Primaria. As mestras de Relixión e Alternativa a Relixión aceptaron a proposta do Equipo da  Biblioteca de traballar xuntas unha das suxestións didácticas da páxina de ACNUR: as consecuencias da guerra na poboación civil. Buscaron imaxes alusivas e imprimíronas engadindo por escrito as súas impresións. Quixeron plasmar unha mensaxe de esperanza pola Paz. O resultado foi este:


Dixeron NON!!! aos horrores e á violencia.

Na parede oposta deixaron unha mensaxe de esperanza.

Os usuarios e usuarias da Bibliolaxeiro queren ABRAZAR A PAZ!!!.





domingo, 17 de diciembre de 2017

GUÍA DE LECTURAS PARA O NADAL

Como cada ano gústanos publicar unha guía de lecturas para axudar a elixir títulos que podan resultar atractivos. Para elaborala tivemos en conta o título do PDI deste curso "Queres coñecer Vigo comigo?" Eliximos contos sobre a cidade pero tamén sobre  civismo e bos costumes. Engadimos algún título de María Victoria Moreno, protagonista das Letras  Galegas 2018, e de Antonio García Teijeiro, gañador do Premio Nacional de Literatura Infantil 2017.






Esperamos que vos guste e aproveitamos para desexarvos  a todos e todas un BO NADAL 2017.


http://quehacerenvigo.es/programacion-de-navidad-en-vigo-2017/

miércoles, 6 de diciembre de 2017

RONDA DE ANIMACIÓNS LECTORAS

Esta semana tivo lugar, na aula de audiovisuais, unha ronda de animacións á lectura a cargo do alumnado de quinto de Ed Primaria. Por segunda vez, neste curso, púxose en práctica esta actividade. Apréciase unha maior soltura nas exposicións,  resultado da progresiva adquisición de  confianza en si mesmos para falar en público.

Os alumnos e alumnas len un título que lles parece atractivo; tras a lectura preparan e realizan unha presentación diante dos compañeiros e compañeiras na que comentan as súas impresións sobre o argumento do libro ou sobre o  autor/a. A exposición acompáñase dalgún tipo de animación como pode ser unha poesía, un teatrillo ou un traballo de plástica. Tamén poden comparar varios títulos dun autor completando á actividade coa biografía,  ou confrontar un libro e a súa película, etc... Todo resulta válido con tal de que lean e sexan capaces de expoñer oralmente traballos sobre as lecturas. Pódese facer individualmente ou en pequeno grupo.

O obxectivo desta actividade vai dirixido a fomentar o uso da lectura, desenrolar o espírito crítico, mellorar a expresión oral e poñer en práctica o traballo en equipo.
  
Sara e Paula nun momento da súa exposición
Alán quixo comparar varios títulos do mesmo autor.

Uxía, Ana Uxía e María engadiron un traballo de plástica á animación.











Pablo e Andrés na súa exposición.






lunes, 27 de noviembre de 2017

Un venres de ciencia en galego no Laxeiro.


E chegou o momento de poñer a nosa biblioteca ao servizo da ciencia en galego. Nenos, nenas e profesoras de Educación Infantil gozaron dunha divertida xornada de experimentos: globos que se inflan por arte de maxia ou manchas que escapan do deterxente; pero mellor mostramos as imaxes:

MAXIA CON VINAGRE E BICARBONATO
Os nenos e nenas de 3 anos e todos os asistentes viron incharse un globo cando se mistura o vinagre e o bicarbonato


Nesta imaxe, os alumnos e alumnas de cuarto de Educación Infantil observan con interese, como as manchas no leite escapan do lavavaixelas.



EXTRAORDINARIA CHARLA - OBRADOIRO IMPARTIDA POR BIÓLOGOS DA UNIVERSIDADE DE VIGO

Mentres, os maiores gozaban dunha charla - obradoiro impartida por expertos biólogos sobre a vida animal e vexetal. E tan expertos!, tanto como que  son  profesores da Facultade de Bioloxía da Universidade de Vigo. Actividades deste tipo énchenos de satisfacción como mestras e como membros do Equipo de Biblioteca, xa que resulta moi positivo e motivador que homes e mulleres de ciencia  realicen labores de divulgación entre o alumnado máis pequeno.






O cartel anunciador da actividade.








Para comezar, os biólogos presentaron  un Power Point. Nel puidemos ver:  a clasificación de animais, información sobre os máis intelixentes e os máis fortes ademais dos máis traballadores; animais en perigo de extinción e extinguidos; animais de diferentes razas, destacando as de raza autóctona como por exemplo a vaca rubia galega, o cabalo galego, o can de palleiro. 


Os expertos contestaron a todas as dúbidas.


Tras a charla, os alumnos e alumnas pasaron en pequenos grupos para ver unha pequena exposición que montaron na sala, e puideron mirar a través de microscopios de última xeración curiosidades, como unha cabeza de formiga ou unha pulga.



Todos e todas puideron observar, en clave científica, arañas, saltóns, tartarugas, estrelas de mar, caracolas...


                                               






AGRADECEMENTOS
Para rematar, fixémoslle un pequeno agasallo aos Profesores para agradecerlles a súa presenza  e a súa labor divulgativa totalmente desinteresada. Desde esta páxina queremos darlle as GRAZAS outra vez e con maiúsculas!!!


                                     
                                              IMPRESIÓNS DO ALUMNADO

 “Gustounos moito a charla porque aprendimos cousas sobre todo tipo de animais: pequenos, grandes, fortes, débiles, terrestres, mariños… Ademais amosáronnos as partes dun microscopio. Foi moi divertido!”


Sofía, María, Xaido e Lucas.




“A charla gustounos moito porque nos enseñaron animais moi raros que nunca víramos”.
Ayelén, Alejandra, Nicolás e Alan.



“A charla foi moi interesante porque nos falaron de todo tipo de animais, de que comían, como se reproducían. Encantounos!”
Naiala, Estela, Juan, Xulio.



“A charla estivo moi ben, aínda que non puidemos ver o vídeo porque non funcionaba, aprendimos moitas cousas sobre distintos tipos de animais”.
María, Raúl, Hugo e Sara.



“Gustounos moito porque nos amasaron moitas cousas interesantes. Vimos pulgas e a cabeza dunha formiga co microscopio”.
Ana Uxía, Mario, Sara, Iago, Sara.


“Gustounos moito a charla porque nos gustan moito os animais e faláronnos de moitos deles, dixéronnos que había millóns de especies de animais!”
Javier, Andrés, Xiana e Uxía.

domingo, 19 de noviembre de 2017

MES DA CIENCIA EN GALEGO 2017

Como cada ano en novembro, adicámonos a promocionar a ciencia en GALEGO na biblioteca.
Expoñemos na entrada fondos de ciencias en galego, xunto con xogos que axudan a traballar esta disciplina dun modo lúdico. A intención é contribuír a asentar os coñecementos adquiridos, a través do xogo.






 



Confeccionamos un documento para os cursos de Ed Infantil con experimentos sinxelos para poñer en práctica nas aulas.